سلسله صيانه البوتاجاز الغاز الجزء الثاني - الصفحة 2

medaly5555 · 19-10-2015, 10:24 PM

السلام عليكم و رحمة الله

الساده الفنيين و مهندسين المنتدى

ارجو مساعدتى فى تعلم صيانة افران الغاز او الديزل الخاصة بالافران الايطالى او المخابز الايطالى لان التوكيلات بتحتكر هذا النوع من الصيانة لانو مزيج من الكهرباء و الميكانيكا

فهل من متطوع حتى لشرح و طرح الافكار الخاصة بهذا النوع من الافران والذى يخص المخابز و هو قطاع كبير بالسوق المصرى
ولكم جزيل الشكر

مهندس / محمد على محمود
01118019562

samoal · 12-11-2015, 11:06 PM

مساء الخير عندي مفتاح الفرن في الغاز لما بشيل ايدي عنو بيطفي ممكن المساعدة مع العلم انو كنت اكبس 5 ثواني فقط

احمد خزيم · 28-03-2016, 11:20 PM

اقتباس المشاركة الأصلية كتبت بواسطة هيما79

اخوتي في الله
ذكرنا سابقا اغلب مراحل صيانه البوتاجاز بالنسبه للشعلات وطرق تعديل قوه النار وايضا طريقه تسليك الفواني او تبديلها حسب مقتضيات الامر
والموضوع اليوم باذن الله تعالي فرن البوتاجاز من حيث مشاكله وطرق الصيانه والاستبدال
نبدا علي بركه الله
صلي علي النبي يا سيدي
انت عارف ان اغلب الافران للوبوتاجازات الحديثه ليها شعله عليا ( الشوايه) وشعله احري سفليه
نبدا اولا بالعليا:
طبعا انتم بتلاحظم ان النار بتاعتها هاديه جدا......طيب ليه؟؟
شعله الشوايه لو زادت عن الحد المعقول او الطبيعي مع مرور الوقت بتاكل في قبوه (سقف) فرن البوتاجاز
وايضا من عيوبها انها مع الشغل الكتير او الفترات الطويله بتلاحظ ان المفاتيح اصبحت تقيله جدا ..مش كده
واحيانا بيتكسر المفتاح الخارجي من الحراره الخارجه من الفرن
((( وان شاء الله هقولكم في الموضوع التالي ازاي تخلي البوتاجاز 24 حصان يعني لا يتاثر باي شئ
المهم حضرتك عاوز تظبط النار بتاعتها هتعمل ايه
خليك معايا::
افتح باب الفرن واخرج الصاج اللي فيه والشبكه وخليه فاضي
وبعدين بمفك صليبه هتلاقي مسمار قلاووظ مثبت الشعله في اعلي الفرن سيادتك هتفكه
بعد كده هتلاقي الشعله في ايدك
امسكها واخرجها من الفرن وخبط عليها باي حاجه هتلاقي صدا اسود هينزل منها بعد ما تقلبها من ناحيه الماسوره بتاعتها
اعمل كده كام مره لحد ما تتاكد انها بقت نظيفه
صلي علي النبي
سيبك بقي من الشعله اللي في ايدك وبص جوه الفرن مكان تركيب الشعله بصيت؟؟؟
هتشوف الفونيه قدام عنيك فاكر ابره التسليك اللي معاك
هاتها ودخلها في الفونيه ولف يمين وشمال
وشغل الغاز وشوفها زادت ولا لا
بعد كده ركب الشعله وجرب
ونفس طريقه تغيير الفونيه لوحبيت تغيرها لكن لازم يكون معاك مفتاح 8 \10 بيبه علشان يدخل للفونيه جوه
المفتاح مبيزيتش عن 8 جنيهات اشتريه يا اخي وريح نفسك
والشعله اللي تحت نفس الطريقه هتفك المسامير وتسلك الفونيه او تغيرها
ملحوظه
هتلاقي وانت بتركب الماسوره لو دخلتها اوي لحد الشعله النار بتشود ولو بقت بره شويه النار بتبقي كويسه
فحاول تظبط نفسك وانت شايف الصح قدام عينك
ندخل دلوقتي علي الشوايه:
قول لا اله الا الله محمد رسول الله
دلوقتي الشوايه مش شغاله؟
اتاكد من الكهرباء كويس ازاي
اللمبه شغاله ولا لا او الاشعال شغال ولا لا؟؟؟
كده اتاكدنا ان في كهرباء واصله البوتاجاز
اول خطوه :
حضرتك سامع صوت للموتور ولا لا؟
لو سامع :::::::: اتاكد ان الزراع راكب كويس
طيب لو مش سامع اي صوت
كده عندنا كام حاجه::
اولا : المفتاح مش واصله كهرباء
ثانيا : ممكن يكون احد اطراف الاسلاك مقطوعه
ثالثا : المفتاح تالف
رابعا : الموتور نفسه اما انه قافش او اتحرق
طيب الحاجات دي كلها هنتاكد منها ازاي؟؟
وهنعرف العيب من اي جزء بالضبط؟؟
وطرق التغيير او الاصلاح ازاي؟؟؟؟
باذن الله في الموضوع المقبل علشان انا طولت عليكم
وعلشان برده منخلطش كل حاجه علي بعضها
ارجوا من الله عز وجل ان يتقبل اعمالنا خالصه لوجهه الكريم وان يستفيد منها من يعلم ومن لا يعلم
اسال الله لنا ولكم حسن الخاتمه
امين
والسلام عليكم ورحمه الله وبركاته
اخوكم في الله
ابراهيم السماحي
( ابو يوسف)

اسلوبك جميل يا استاذ ابراهيم وشكرا للك