الف شكر ليك يا باشمهندس سد
وعلشان خاطر عيونك انت هكمل
الموديل التاني هو GP 160
وهو موديل غلس في صيانتة علشان كدة انا وضعت لكم parts catalog , sevice hand book , sevice manual
علشان اللي عايز يشتغل يبقي مش محتاج حاجة تاني
نظرة عامة علي الموديل :
ال GP يعني general purpose ودة بداية الدجيتال
يعني الماكينة دي ممكن تتوصل بكمبيوتر وتشتغل طابعة وماكينة تصوير واسكنر
بس طبعا لازم يكون مع الماكينة كروت التوصيل مع الكمبيوتر
الماكينة مشاكلها قليلة بس قطع غيارها مش متوفرة قوي
واسيبكم دلوقتي مع الرابط
http://www.megaupload.com/?d=ZH306VZA

على فكرة انا ماعنديش اي خبرة في صيانة ماكينات التصوير وانواعها علشان يمكن المانوال مش مفيد الى حد ما بالنسبة لي حاليا لكن بكل تأكيد هحتاجه فيما بعد لما افهم شوية في الموضوع .

المعلومات المقتبسة اعلاه هي اللي حسيت انها مفيدة لشخص مبتديء لا يعلم اي شيء عن ماكينات التصوير مثلي انا .

لي موضوع اسمه ( قبل شراء ماكينة التصوير ) وضعت به اسئلة كثيرة كان من ضمنها اسئلة عن مثل ما ذكرت .

ماكينة عمرها الافتراضي صغير واخرى كبير
ماكينة تكلفة التصوير فيها قليلة واخرى العكس
امكانيات الماكينة نفسها

لذلك انا متحمس لموضوعك واتمنى ان تستمر على نفس المنوال من ذكر مميزات وعيوب الماكينة .

ولك جزيل الشكر

بارك الله بعمرك وعملك

وجعل أعمالك الدنيوية ذخرا لك في الأخرة

إمضي وكن مثل الزهرة التي تعطي الروائح الطيبة ولا تنتظر الشكر من

تحياتي لك

ايوة كدة يا جماعة شوية حماسة علشان الموضوع يسخن
متشكر قوي ليك يا موجة هيد باشا
اكرمك اللة واعزك

اخي العزيز المهندس الكترون
قد طلبت مني منذ فترة مانيوال الماكينة IR1600 وقد تاخرت عليك كثيرا
ولكن الامر خارج عن ارادتي حيث الاسطوانة التي بها المانيوال كانت معطوبة ولا تقبل نسخ
ولكن بحمد اللة تم الحصول علي اسطوانة اخري جديدة وتم رفع المانيوال
نظرة عامة علي الموديل
الموديل دة متوافق مع IR 1600, 1610 , 2000 , 2010
النظرة الاولي علي الموديل يتضح ان تصميمة ضعيف
بة عدة عيوب خطيرة اهمها
1- لا يوجد دوبلكس بمعني ان الماكينة لا يوجد بها تصوير علي الوجهين ودي تعتبر سقطة من كانون لان مش ممكن في الوقت اللي بنطور اداء ماكينات التصوير نرجع بظهرنا لورا ونلغي اوبشن في منتهي الاهمية بدون اي سبب منطقي
2- السوفت وير للماكينة غير مستقر وكثيرا ما يحتاج الي اعادة تحميل ودي طبعا مشكلة كبيرة قوي لان الموضوع دة مكلف و مش اي حد بيعملة
3- نظام سحب الورق تصميمة ضعيف بشكل واضح ( لية عملوا كدة مش عارف !!!)
4- عمر الدرام 20,000 نسخة فقط وبعدها تتوقف الماكينة تماما وتعطي رسالة خطاء وطلب الاتصال بالوكيل( ودة طبعا معروف سببة علشان يبيعوا ويكسبوا)
5- كثيرا ما تعطي رسائل خطاء عن امتلاء العادم بشكل مزعج واحيانا كثيرة يكون العادم غير ممتليء بالمرة
عموما انا شركت الماكينة بس انا اسف
اصلي انا بحب كانون قوي قوي وبزعل قوي لما بتخرف في موديل وتطلع حاجة نص نص
انا مكنتش هرفع الموديل دة خالص بس لولا طلب الاخ العزيز الكترون
والان مع الرابط

http://www.megaupload.com/?d=BW6ZY26V
سلام والي لقاء اخر بامر اللة

الشكر للة ثم ليك ايها المشرف العزيز
واللة الغرض من الردود مش الشكر انا بس عايز احس بالتفاعل مع باقي الاعضاء وهل اللي بنقدمة كويس ولا مش عاجب حد او في حد استفاد ولا دي مضيعة وقت
المهم خلينا نكمل شغلنا
موديل النهاردة هو NP3050
الموديل دة من النوع ال Mid volume يعني سرعة متوسطة حوالي 30 صورة في الدقيقة وانالوج
ماكينة قوية كانت في وقت من الاوقات مكتسحة ومسيطرة في السوق
تكلفة الورقة قليلة وتكلفة الصيانة كمان مش كتيرة
عمر الدرام 150,000 نسخة تقريبا
كل الماكينة مميزات بس تعالوا نتكلم علي العيب الظاهر وكيفية التغلب علية
انا هحاول اشرح الموضوع بطريقة بسيطة
كل ماكينات كانون فيها نظام التخلص من العادم
طب اية هو العادم : العادم دة هو باقي الحبر اللي ماطبعش علي الورقة و موجود علي الدرام
طيب علشان اطبع ورقة تانية لازم اتخلص من باقي الحبر دة ( العادم ) و انظف الدرام علشان تظهر الصورة التانية واضحة بدون اي ظلال او مشاكل
طيب ازاي اتخلص من العادم دة : الميكانزم كالاتي
1- شريحة بلاستيك موجودة علي الدرام ( كلينر بلاد ) تمسح كل الحبر الزائد من علي الدرام
2- كل العادم يلتصق بعمود بطول الدرام ( ماجنيتك رول )
3- يوجد شريحة بلاستيك اخري ( اسكرابر ) موجودة فوق الماجنيتك رول تلم العادم كلة وتنزلو علي سوستة طويلة متحركة 0 ويتحرك مع السوستة ويدخل جوة الدرام ( في قلب الدرام )
خلاص كدة المهندس بقي كل فترة يفك الدرام ويزيل العادم
قصة طويلة معلش
بس المشكلة فين بقي : المشكلة في الماجنتك رول بعد فتر ة مبيلتصقش فية العادم وبيسقط علي الورقة وبيعمل شكل بطوش حبر
والمشكلة دي بنسميها تسقيط حبر
مشكلة كبيرة مبينفعش فيها النظافة او الصيانة ولا يوجد حل غير تغيير وحدة الدرام كاملة ودي طبعا غالية قوي
او انك تلاقي ماكينة قديمة فيها الماجنتيك رول بحالة كويسة
اسف اني طولت عليكم بس حبيت اوضح المشكلة الوحيدة في الموديل دة
وعلي فكرة كانون منزلتش تصميم التخلص من العادم بالطريقة دي في اي موديل تاني علي الاطلاق ( طبعا لانة ثبت فشلة )
هسيبكم دلوقتي مع الرابط والي لقاء اخر بامر الله

http://www.megaupload.com/?d=UDY3660K

اخى العزيز الفاضل المهندس عادل لاأجد الكلمات المعبرة عن شكرى وامتنانى لك فى تلبية طلبى واشكرك من كل قلبى واتمنى لك من كل قلبى الصحة والعافية وان يكون هذا العمل الذى تقوم به فى ميزان حسناتك واتمنى من الله لك النجاح والتوفيق........واشكرك واشكر مشرفى المنتدى وكل من له مشاركات فعالة وعظيمه.

(خيركم من تعلم العلم وعلمه )