[الايطالى]

السلام عليكم
انا عندى شاشة ديل قاطعة بور خالص
فكرتى عن الشاشات بسيطة اخدتها من المنتدى الجميل بتاعكم

وعايز ابدا افحص الشاشة
ودى اول مرة

ازاى افحص الافو ( عندى خلفية كاملة عن الافو وطريقة استخدامه )
أجزاء الشاشة من الداخل دون ان اتعرض لصدمة كهربائية

طريقة قياس كل المكونات داخل البوردة بالافو والكهرباء واصلة ازاى ؟

مثلا دائرة الباور فين الارضى بتاعى
ودائرة اللاين فين الارضى بتاعى

والافو الطرف الاسود يكون فين اثناء القياس

ولو حبيت أفتح الشاشة واوصلها بالكهرباء ازاى اقيس بالافو فى وضع التوصيل

طمعان فى كرمكم - ربنا يجازيكم خير - توضحوا هذه النقط ببعض التفصيل

[most4]

اقتباس المشاركة الأصلية كتبت بواسطة الايطالى السلام عليكم انا عندى شاشة ديل قاطعة بور خالص فكرتى عن الشاشات بسيطة اخدتها من المنتدى الجميل بتاعكم وعايز ابدا افحص الشاشة ودى اول مرة ازاى افحص الافو ( عندى خلفية كاملة عن الافو وطريقة استخدامه ) أجزاء الشاشة من الداخل دون ان اتعرض لصدمة كهربائية طريقة قياس كل المكونات داخل البوردة بالافو والكهرباء واصلة ازاى ؟ مثلا دائرة الباور فين الارضى بتاعى ودائرة اللاين فين الارضى بتاعى والافو الطرف الاسود يكون فين اثناء القياس ولو حبيت أفتح الشاشة واوصلها بالكهرباء ازاى اقيس بالافو فى وضع التوصيل طمعان فى كرمكم - ربنا يجازيكم خير - توضحوا هذه النقط ببعض التفصيل

ان شاء الله هاوافيك بكل اللى اعرفه فكلنا هنا بنتعلم من العمالقة بالمنتدى بارك الله فيهم....

دائرة الباور بتكون فى اول الشاسية الخاص بالشاشة او فى احيان اخرى تكون فى اخر الشاسية فى بعض الاحيان على حسب تصميم الشاشة
دائرة الباور تبدء بمدخل الفيشة الخاصه بالكهرباء ثم بعد ذلك الفيوز ثم قنطرة ثم خانق او ملف ثم قنطرة توحيد تكون فى بعض الاحيان اربعة موحدات دايود او قنطرة توحيد.
صورة لتوضيح شكل قنطرة التوحيد


صورة للاربعه دايود فى دايرة باور الخاصة بالشاشة ومكتوب عليها ايضا اسماء بعض العناصر


العناصر وقياسها
بالنسبة للمقاومات يجب معرفة قيمة المقاومة من خلال الالوان الموجودة عليها او فى بعض الاحيان يدون عليها قيمتها
المكثفات اعطال تكون ظاهرة اى يكون بها تسريب من اسفل او انتفاخ ظاهر باعلى المكثف
الموسفتات لها قياسات
رابط بالمنتدى لطريقة القياس
http://www.qariya.com/vb/showthread.php?t=60123

الموحدات يقيس فى اتجاه واحد فقط اى وضع طرف الافو على احد اطراف الموحد ثم وضع الطرف الاخر على الطرف الثانى للموحد اذا تم قرائة قيمة يتم عكس طرفى الافو اذا لم يعطى اى قيمة فهو سليم على وضع الجرز اذا اعطى قيمة على الاتجاهين فهو تالف اذا اعطى شورت ايضا فهو تالف

بالنسبة لقياس الفولت اثناء تشغيل الشاشة
اى عنصر قبل الشوبر نضع طرف الافو الاسود على الارضى الحار اى ارضى مكثف الاليكو والطرف الاحمر على العنصر المراد قياس الفولت له

بعد محول الشوبر نضع الطرف الافو الاسود على الارضى العام مثل ارضى اللاين وهو المبرد المحيط باللاين ثم الطرف الاحمر على العنصر المراد قياس الفولت له.

بالنسبة للعطل اللى معاك عطل الباور الطريقة المتبعة منقول من مواضيع المنتدى

1- قم بفتح الشاشة وقم بقياس الفيوز علي وضع الbuzzer اى الجرز اذا لم يقيس او كان واضح علية احتراق قم بتغييرة.
2- قياس الاربعة دايود وتغير التالف منهم اذا كان باحدهم شورت
ملخص الكشف في دائرة الباور
1- قياس الجهد علي المكثف الكيميائي الكبير من 400-300 فولت
2- قياس الجهد علي ic uc 3842 علي الرجل 7 من 12 فولت
3- التأكد من المقاومات التي تصل الجهد الي هذا الايسي ic
4- قياس الموسفت الرجل الوسطي عليها 280 فولت وقياس المقاومات الفيوزية حولها ومقاومات التغذية

عيب اخر لكن مش في دائرة الباور
يوجد هزة جامدة او رعشة جامدة في الصورة قم بتغيير المكثف الكميائي الكبير (الاليكو)
المرحلة الثانية التقطيع:
الايسي والموسفت الي الشوبر
1- الفيوز محروق عند تغييرة يتحرق مرة اخري
كدة عيب شورت اما في icالمذبذب والموسفت وتأكد من الزنرات
2- الفيوز سليم والشاشة لا تعمل
التأكد من المقاومات مقاومتين تغذية الic والمقاومات الفيوزية

متابع معاك ان شاء الله

[الايطالى]

اخى الفاضل واستاذى العزيز

لا اجد كلمات تليق او تعبر عن امتنانى وشكرى

جزاك الله خيرا

ونفعك وبارك لك فى علمك وزادك سعة فيه

وأشكرك شكر عميق على ما تفضلت به من الاهتمام والرد على سؤالى

وسامحنى انى أكثر عليك فى الاسئلة

لو تفضلت

بخصوص

قياس الجهد علي ic uc 3842 علي الرجل 7 من 12 فولت

هل هو ايسى الباور
وازاى اعرف رجله رقم 7 واقيسها

وبالنسبة لقياس الترانسستور الباور من على رجله الوسطى

ارقيسها ازاى

ارفعها من على البوردة بشفط اللحام حولها

طيب الافو الاسود بيكون فين عند القياس للرجل الوسطى

والمفروض القراءة تكون فى حدود كام

جزاك الله خيرا

وسامحنى على التطويل

[most4]

قياس الجهد علي ic uc 3842 علي الرجل 7 من 12 فولت هل هو ايسى الباور وازاى اعرف رجله رقم 7 واقيسها

فى خدمتك ياغالى ولايهمك
صورة توضيحية للايسى واليورءة دية اللى بتحدد اتجاه الايسى وهو بيكون فى دائرة الباور طبعا


وطبعا قياس الفولت طرف الافو الاحمر على رقم 7 والطرف الاسود على سالب مكثف الاليكو اكبر مكثف فى شاسية الشاشة

وبالنسبة لقياس الترانسستور الباور من على رجله الوسطى ارقيسها ازاى ارفعها من على البوردة بشفط اللحام حولها طيب الافو الاسود بيكون فين عند القياس للرجل الوسطى والمفروض القراءة تكون فى حدود كام

للتاكد من صلاحيتة ارفعه خارج الشاسية وقم بالقياس على وضع الجرز ضع الطرف الاسود على الرجل الوسطى للموسفت والطرف الاحمر على الطرف الاول للموسفت مرة والطرف الاخير مرة اخرى يعطى قرائة واحدة مغ اى من الارجل ولايعطى اى قيمة فى الرجل الاخرى ومش مهم قوى بالنسبة لك القيمة
وقياس الفولت زى مانا كتبت بالمشاركة الاولى

[banna1980]

الله يبارك لكككككككككككككككككككككككككككككك

[الايطالى]

اخى الاستاذ الفاضل most

أشكرك من عميق قلبى على ردك واهتمامك

جعله الله فى ميزان حسناتك

ربنا يبارك فيك

عندى بعض الاسئلة ان لم تشعر بضيق منى

لكنى مبتدىء

السؤال الاول

كيف اتخلص من شحنه اللاين بطريقة واضحة وبسيطة وسهله



السؤال الثانى


كيفية توصيل لمبة السريا بالضبط
وكم قيمة اللمبة بالوات
وما معنى ان تضىء اللمبة او لا تضىء او تضىء اضاءة خافتة ؟
ما هو تشخيص كل وضع


السؤال الثالث


كيفية خلع آيسى الباور او اللاين
هل يكون بالهوت اير ام بالشفاط والمكواة



السؤال الرابع


الطقع التالفة

اجيبها منين وبكام

ترانسستور الباور
ترانسستور اللاين
الموحدات او قنطرة التوحيد
مكثف الاليكو

وهل فيها تقليد او غش ايضا عند الباعة المتخصصين ؟ وحدود السعر التقريبى عند شراءها


السؤال الخامس


ما هى فائدة مادة الفلكس التى تشبه علبه الفازلين - وما هو انضف نوع فيها وكيف تستخدم بالضبط فى عمليات اللحام

ما هى فائدة القلافونيا واين تباع ؟

كيف يمكن تنظيف سكن المكواة جيدا

وتقبل احترامى وتقديرى الشديد لك

[سانانا]

طيب يا جميل اذاى اقيس المقومات قبل الايس 3842 اذا كان الفولت مش واصل اليه يا ريت بالصور مع تحديد شكل المقومات

[ramy sharf]

السلام عليكم ورحمة الله وبركاته

كيف اتخلص من شحنه اللاين بطريقة واضحة وبسيطة وسهله

الشاشة تكون مفصولة من الكهرباء ثم تقوم بإحضار مفك طويل معزول وتقوم بتوصيل طرف سلك لجسم المفك والطرف الآخر بأرضي الشاشة (سلك ملفوف حول الشاشة متصل بأرضي الشاسيه) ثم تمسك المفك من اليد المعزولة وتقوم برفع جلدة اللاين بواسطة المفك وتوصيله بطرف اللاين حتي تسمع صوت طقطقة وبذلك تكون قد فرغت الشحنة منه

السؤال الثانى
كيفية توصيل لمبة السريا بالضبط
وكم قيمة اللمبة بالوات
وما معنى ان تضىء اللمبة او لا تضىء او تضىء اضاءة خافتة ؟
ما هو تشخيص كل وضع

أولا كيفية عمل السريا تقوم بإحضار طرفين سلك توصل البداية بمدخل التيار 220 فولت ونهاية الطرفين ببريزة التي ستقوم بتوصيل الجهاز المراد إختباره بها ثم تقوم بقطع أحد الطرفين وتوصلة بلمبة 200 وات
1- إذا كانت إضاءة اللمبة شديدة فهذا يدل علي وجود شورت أوقفلة بالبور
2- إذا كانت الإضاءة الخافتة فهذا يدل علي عمل الجهاز بصورة طبيعية
3- إذا كانت اللمبة غير مضاءة فهذا يدل علي عدم وصول التيار للجهاز المراد إختباره فيكون العيب إما من سلك الفيشة أو الفيوز تالف

السؤال الثالث
كيفية خلع آيسى الباور او اللاين
هل يكون بالهوت اير ام بالشفاط والمكواة

كيفية خلع آيسي الباور واللاين يكون بالكاوية والشفاط أو الشيلد
أم الهوت إير تستعمل لرفع الآيسيهات اللصق

السؤال الرابع
الطقع التالفة
اجيبها منين وبكام
ترانسستور الباور
ترانسستور اللاين
الموحدات او قنطرة التوحيد
مكثف الاليكو
وهل فيها تقليد او غش ايضا عند الباعة المتخصصين ؟ وحدود السعر التقريبى عند شراءها

قطع الغيار تقوم بشرائها من محلات بيع قطع الغيار الإلكترونية بالطبع يوجد قطع غيار مقلدة صيني وهناك قطع ياباني والسعر يختلف من قطعة للأخري

السؤال الخامس
ما هى فائدة مادة الفلكس التى تشبه علبه الفازلين - وما هو انضف نوع فيها وكيف تستخدم بالضبط فى عمليات اللحام
ما هى فائدة القلافونيا واين تباع ؟
كيف يمكن تنظيف سكن المكواة جيدا

الفلكس هي مساعد لحام تستخدم مع الكاوية لفك قطع من الشاسيه ومع الهوت إير توضع علي القطعة المراد خلعها أو لصقها ويمكنك شراء الفلكس الألماني فهو جيد
أما القلافونيا تستخدم لتنظيف سن الكاوية وذلك بوضعه في القلافونيا ثم تقوم بمسحه يقطعة إسفنج مبللة أو قطعة ورق ويمكن شراء سن كاوية ياباني أو تايوني فهو أفضل وسهل التنظيف ويعيش فترة أطول