[mastersoft]

بسم الله الرحمن الرحيم
الحصة الاولى

سنتكلم فى هذه الحصة عن الموضوع من الاول خالص
تعالوا نفترض مع بعض المثال التالى
لو احنا عندنا لمبة و عايزين نشغلها
نعمل ايه ؟؟؟
ببساطة هتردوا و تقولوا نجيب سلك و دواية للمبة و بطارية و نوصلها ببعض اللمبة هتشتغل
برافو ...... فعلا اجابة سليمة 100%
طيب لو عايزين نخليهم 10 لمبات.
معتقدش ان الموضوع عايز تفكير
هو نفس اللى عملناه فى اللمبة الواحدة
صح و لا غلط .... اكيد صح مليون فى المية
طيب نزود شوية
عايزين نثبت اللمبات دى على حاجة
بمنتهى البساطة تانى
نجيب لوح خشب و نثبت فيه اللمبات و الاسلاك و البطارية
طيب عايزين نكتر اللمبات نخليها مثلا 1000 لمبة
و فى نفس الوقت مش عايزين نكبر مساحة اللوح الخشب. نعمل ايه ؟؟؟
متفكرش كتييير ...... ايه رائيك نجيب كام لوح صغنانين و نحطهم فوق بعض
فكرة حلوة مش كده ...!!!!!!!!!!!!!!!
طيب نكمل تعقيد شوية فى الموضوع
عايزين نعمل باللمبات دى فرح و ديسكو ، يعنى لمبات تنور و لمبات تطفى و نروش بقى
الحل ايه ؟؟؟؟
هنا بقى قدامنا حلين :
1- نجيب شوية مفاتيح و نوصلها بالمبات بالشكل اللى احنا عايزينه و نقعد نولع و نطفى للصبح بس بايدينا. الحل ده مش عاجبنى
و اكيد مش عاجبك انت كمان
2- طيب يبقى نوصل اللمبات بقى بالكمبيوتر و نعملها برنامج يتحكم فيها اتومتيكى و يبقى لا سحر و لا دجل و لا شعوذة .
فكرة حلوة عجبتنى و اكيد عجبتك ......
بس متقلش صعبة كل حاجة بقت سهلة اليومين دول.
بس تعرف يا سلام بجد لو عرفنا اننا نخلى البرنامج ده على هارد ديسك و لا سي دى و يشتغل لوحده من على لوح الخشب ده مع اللمبات و نوفر الكمبيوتر و الصداع بتاعه
فاصل وسنعود

مع تحيات محمد العدوى
مشرف قسم الصيانة
القرية الالكترونية

[mastersoft]

بجد اسف جدا على انى رغيت و صدعتك شوية و انت عمال تقول هو عايز يقول ايه.
انا اوضح بقى لسيادتك انا عايز احكى فى ايه :
الموضوع بمنتهى البساطة ان فكرة اى جهاز كهربا فى الدنيا هى الفكرة البسيطة اللى احنا لسة كنا بنتكلم فيها.. ايوة بجد اى جهاز كهربائى بيشتغل كده و اوضحلك ازاى اكتر.
بص يا عم :
اللوح الخشب اللى احنا مثبتين عليه اللمبات و الاسلاك و المفاتيح و الهارد ديسك ده بنسميه فى اى جهاز كهربا باسم اللوحة الام mother board و الاسم الشائع ليها بينا هو البوردة.
و الكام لوح اللى احنا زودناهم علشان منكبرش المساحة بتاعة الوح الخشب الاولانى قصدى البوردة دول بيبقوا شوية طبقات فوق بعض فى البوردة بتاعتنا و فى الغالب بيبقوا من 7 الى 9 طبقات و ان كان معظم الاجهزة الحديثة بتبقى الطبقات فيها اكتر من كده .
عارف هتقولى و ديه اسمها ايه فى الاجهزة الكهربية ، دى يا عم اسمها layers طبقات برضه يعنى ... السؤال الاهم هو ازاى نعرف نربط الطبقات دى ببعضها ، ااقولك بمنتهى البساطة نوصل النقط المشتركة بينها باى حاجة و على البورد فى الاجهزة هنلاقى البوردة مخرمة و الخروم دى عبارة عن كبسولات معدن .... بص على البورد و انت هتلاقيها .
طيب و اللمبات و المفاتيح و الحاجة اللى عاملة زى الهارد ديسك دى تبقى ايه ...
دى يا عم تبقى بقى اللى بنسميها قطع الغيار spare parts و هى دى اللى لما فيها حاجة بتبوز بنغيرها
يعنى لو لاقينا لمبة محروقة و لا مفتاح باز فى المثال بتاعنا مش هنغيره ، طيب نيجى للباقى و هو السلك .... هتقولى بسيطة نوصله على البوردة و كلامك صح بس تعال فكر شوية و شوف كم السلك ده كله هيعمل زحمة و لخبطة قد ايه ،،،،،،،،،،،،،
ممممممممممممممم ، طيب و الحل ايه ؟
بص يا عم الحل برضه بسيط و هو اننا نرسم السلك ده على البوردة بس نرسمه بحاجة توصل كهربا طبعا لقطع الغيار من البطارية ، عارف هتقولى زى ايه ... ااقولك زى قلم الدوكو مثلا ... هترد عليا و تقولى طيب ما اهو كده ممكن يكهرب حد او يعمل قفلة....
ااقولك بسيطة بعد ما نعمله نغطيه بطبقة عازلة.... هتقولى طيب و السلك ده اسمه ايه بقى فى الاجهزة بقة ... هو كده كده سلك علشان يوصل الكهربا بس بندلعه و بنسميه track – path و الاسم الشائع ليه هو التراك .

[mastersoft]

اعذرونى اخوانى عن طريقة كلامى ولكن لكثرة التساؤلات والاستفسارات الى بتيجى على الايميل وبيطلبوا كورسات صيانة وعايزين يفهموها بلغة سهلة وسلسة بعيدا عن اللغة العلمية

[mastersoft]

باقى الدواية بتاعة اللمبة او اى حاجة ممكن توصلنا الكهربا من البوردة لقطعة غيار خارجية مش كده........ دى بقة اسمها interface و غالبا بنسميها بالكونكتر .
باقى اخر حاجة و اهم حاجة.... البتاع ده اللى عامل زى الهارد ديسك و مخزنين عليه البرنتامج اللى عايزينه يقوموا باالى محتاجينه منه ... هو ده بقى اللى بنسميه بالسوفت واير بس لازم تاخد بالك من شوية حاجات :
اولا : البرنامج ده اللى احنا بندلعه و نقوله يا سوفت وير موجود برضه على قطعة غيار على البوردة ، بمعنى انه ممكن برضه يبوز او القطعة اللى مخزنين السوفت وير عليها برضه تبوز .
ثانيا : السوفت وير ده اللى هو البرنامج نفسه اسمه flash و بنحمله على قطعة غيار كنا زمان بنسميها bios اختصارا لجملة كبيرة و هى Basic Input Output System بمعنى اساسيات الدخول و الخروج للجهاز . بس الاسم ده مبقاش مكفى اللى احنا محتاجينه من السوفت وير ... مش كده
ثالثا : بما ان ده سوفت وير فممكن انى اعمله تطوير علشان ازود فيه حاجة مش موجودة عندى و ده اللى اسمه update بس طبعا مش محتاجة ذكاء قوى ان التطوير ده لازم قطع الغيار بتاعتى تشغله
و اكيد ممكن انى احذفه او انزله من جديد ، و لو عايز انزله من جديد يبقى ممكن انزل جزء صغنن منه علشان يشتغل صح و ده اسمه partial flash او ممكن انى انزل السوف وير كله و ده اسمه full flash .

يا رب تكون فهمت المثال البسيط بتاعنا ده لانى مش عايزك تحفظ خالص عايزك تبقى مهندس صيانة ناجح بيشغل دماغه و بس.......

[mastersoft]

--------------------------------------------------------------------------------

تعال نراجع بقى بس بتنظيم شوية :
اى جهاز كهربا فى الدنيا من اول الغسالة و التلاجة لحد الموبايل و الكومبيوتر و الدى فى دى بيبقى عبارة عن بوردة مكونة من عدة طبقات عليها قطع غيار و تراكات توصل الكهربا لقطع الغيار دى و اكيد مصدر كهربا علشان يشغل الجهاز .
و اكيد ممكن بعض قطع الغيار تكون بعيدة عن البوردة لاى سبب فبنوصلها للبوردة عن طريق كونكتر .
و فى الاخر مش هنسيب البوردة فى الهوا الطلق ده ، بنروح مجمعينها جوة صندوق يلمها و يحافظ على شرفها ، الصندوق ده كل شوية ناس يسموه بالاسم اللى يعجبهم يعنى :
* بتوع الكمبيوتر بيسموه كيسة case .
* بتوع الموبايل بيسموه هاوسنج housing .
* بتوع التليفزيونات بيسموه فرايم frame .
ده كل الموضوع بمنتهى البساطة

[mastersoft]

لسة عندك وقت
طيب يبقى تعال نتعمق شوية صغنانين اكتر فى كل حاجة ............
بس متنساش اننا هنشرح بعد كده كل حاجة ىبالتفصييييل الممل

قطع الغيار
دى احنا اتكلمنا عليها فى المثال بتاعنا و كانت اللمبات... لسة فاكرها و لا .............
عموما قطع الغيار اللى بتستخدم كتيير قوى و انواعها اكتر و موديلاتها اكتر و اكتر بس متقلقش الموضوع مش معقد لان فيه حاجة اسمها الداتا شيت data sheet و دى بيبقى فيها كل مواصفات قطعة الغيار و بدائلها كمان .
و بعدين ده احنا لسة هنرغى رغى كتيييييييييييييييييييير فى الموضوع ده فى حصة قطع الغيار .
زى ما هنتكلم برضه ازاى نعرف ان قطعة الغيار بايزة و لا لأ يالقياس فى حصة القياس.
بس اكيد انت مش محتاج انى ااقولك لو قطعة الغيار مكسورة او محروقة و متفحمة انى ااقولك ان القطعة دى تبقى بايزة .
بس اللى عايز ااقولهولك ان القطع غيار فى الدنيا كلها شبه استاندارد بمعنى ان ليها مسمى واحد و قياس واحد و استعمال واحد طبقا طبعا للداتا شيت زى ما قلنا ، هى ممكن تتغير فى الشكل بعض الشئ و دى النقطة المهمة اللى انا عايزك تاخد بالك منها .
يعنى زمان كان اى جهاز كهربا محترم كده و يملى العين و حجمه و لا الدولاب البليكار لكن مع الزمن بقت الاحجام اصغر و بالتبعية بقينا عايزين احجام اصغر فى قطع الغيار .
و علشان كده ممكن نلاقى قطعة غيار حجم عقلة الصباع و نسئل الدكتور الباشمهندس بتاع الصيانة ايه دى يرد و يقول قطعة غيار اسمها مكثف و نلاقى جنبها قطعة غيار فى حجم راس الدبوس و لما نسئل نفس الدكتور الباشمهندس بتاع الصيانة ايه دى يرد و يقول برضه قطعة غيار اسمها مكثف .
اللى اقصده ان قطعة الغيار ايا كان مسماها ممكن يبقى حجمها صغنن خالص و بيطلقوا عليها فى الحالة دى ميكرو ويف بس خد بالك ان مسمى القطع الميكرو ويف دى اسم مش علمى 100% و لكن اسم دارج او شائع.
عموما فى حصة قطع الغيار نبقى نوضح اكتر... لكن دلوقتى انا بديك فكرة علشان تحضر الشرح

[mastersoft]

التراكات
و دى بمنتهى البساطة و من غير اى فذلكة هى السلوك اللى بيمشى فيها الكهربا من البطارية او مصدر الكهربا لحد ما توصل لقطع الغيار .
و مش لاقى اى كلام فيها بصراحة غير ان لو السلك ده اتقطع يبقى اللمبة مش هتشتغل لان مش واصلها كهربا ……. فاهمنى و لا اوضح اكتر !!!!!!!!!!!!!!!
اوضح اكتر…… ممكن تلاقى الجهاز اللى جايلك فى الصيانة فيه حاجة معينة مش شغالة
و بما انك ان شاء الله هتكون دكتور باشمهندس صيانة قد الدنيا فانت هتقيس قطعة الغيار المسئولة هتلاقيها سليمة و كل حاجة هتلاقيها سليمة و مع كده الجهاز مش شغال
بمنتهى البساطة ممكن السلك يكون مقطوع… اسف قصدى التراك اللى على البوردة
اكيد انت كده بقى فهمت

البطارية او مصدر الكهربا
مش محتاج اى كلام خالص ….
غير انك لازم تبقى متاكد مليون فى المية ان البطارية او مصدر الكهربا بيوصلوا كهربا
يعنى متستناش ان جهاز الكمبيوتر مثلا يشتغل و الباور سبلاى بتاعه بايز او الموبايل يشتغل و البطارية فاضية .

[mastersoft]

كلاكيت تانى مرة بس باختصار
اى جهاز كهربى بيتكون من بوردة mother board متعددة الطبقات multi layers عليها قطع غيارspare parts و تراكات tracks موصلة قطع الغيار بالبطارية battery او مصدر الكهربا و متجمعة فى صندوق housing و ممكن تبقى فيه اجزاء مش واصلة على البوردة على طول و بنوصلها بكونكتر او اى حاجة ممكن تنقل الكهربا ليها .
و طبعا مننساش ان لازم يبقى فيه قطعة غيار متحمل عليها سوفت وير ينظم عمل قطع الغيار علشان تقوم بالوظائف المطلوبة منها