السلام عليكم,
لو سمحتم عاوز شرح مفصل لهذه المسألة

بص ياسيدى

واضح انك فاهم قانون كيرشوف الاول

الذى ينص على ان مجموع التيارات الداخلة الى نقطة تساوى مجموع التيارات الخارجة منها



وعليه فان

I 3 = I 1 + I 2

ودى المعادلة رقم واحد

قانون كيرشوف التانى بينص على ان مجموع الجهود الموجوده داخل حلقة مغلقة = صفر سواء كانت تلك الجهود بطارية او جهد واقع على مقاومة

لما نحب نطبق قانون كيرشوف على الحلقة المغلقة اليسرى يبقى كان الحلقة اليمنى مش موجوده نهائى وكان اليسرى موجوده لوحدها مع وجود نفس التيارات التى فرضناها من الاول
يعنى I1 بتمر فى المقاومة رقم 1
و I3 بتمر ايضا فى المقاومة رقم 3



الدائرة بسيطة عندك على الشكل البسيط ده مكونة من بطارية 12 فولت ومقاومة رقم واحد ومقاومة رقم 3 وبها تيارين مختلفين I 1 , I 3
ولو كانت دائرة عادية بدون الجهة اليمنى كنت على طول هتقول ان I1 هى نفسها I3
لكن هنا بنكتب التيارات القديمة التى افترضناها من معادلة كيرشوف الاولى

يبقى هنطبق قانون اوم الذى يقول ان جهد البطارية بيتقسم على المقاومات

E1 = I1 *R1+ I3* R3

وانت اصلا عندك من قانون كيرشوف الاول

I3 = I1 +I2
اذن

12= I1*R1 +I1*R3 +I2 *R3

12 =68I1 + 22I3
= 68I1 + 22I1 +22I2

12 =90I1 + 22I2

هكتبها بالعربى عشان الحروف مش واضحة

12 = تسعين فى التيار الاول + 22 فى التيار التانى

ودى المعادلة رقم 2


بنفس الطريقة بالضبط هنتعامل مع الحلقة اليمنى وسيبك من الحل الذى وضعه هو عشان ماتتلخبط



لاحظ فى الصورة ان الدائرة ايضا بسيطة التى عليها الدائرة الصفراء واعتبر ان الجهة اليسرى غير موجوده ولذلك ان قطعتها

هتلاقى انها دائرة مكونة من بطارية 9 فولت ومقاومة رقم 2 ومقاومة رقم 3
والتيارات التى تمر فيها هى نفس التيارات التى فرضناها عند قانون كيرشوف الاول

طبق مجموع الجهود = صفر هتلاقى الاتى

E2 = I2 * R2 + I3 * R3
= I2 *R2 +I2*R3 +I1*R3

9 =33I2 +22I3
=22I2 +33I1+33I2


9 =22I1 +55I2

9 = 22 فى التيار الاول + 55 فى التيار التانى

ودى المعادلة رقم ثلاثة

المعادلة رقم ثلاثة والمعادلة رقم اتنين عبارة عن مجهولين يعنى يمكن حلها بسهولة ماينفعش نطرح على طول حتى نضيع مجهول منهم
ولكن عشان يضيع واحد منهم هنلاقى الاسهل اننا نتخلص من I2 فى المعادلتين
يعنى نضرب المعادلة الثانية فى عدد والثانية فى عدد تانى بشرط لما نطرح نلاقى I2 راحت مع بعضها

عشان كده هنضرب المعادلة الثانية فى 5 والمعادلة الثالثة فى 2
هتطلع عندك التانية كده

60 =450I1 +110I2

المعادلة الثالثة بعد ضربها فى 2 هتبقى

18 =44I1 +110I2

نطرحهم من بعض هيطلع لك

42 =406I1
I1 = 0.103Aعوض فى اى واحدة فيهم هتلاقى

I2 = 0.124 A

عوض فى المعادلة الاولى هيطلع عندك

I 3 = 0.227 A


يارب يكون الشرح واضح

معلش سؤال جاوبني عليه من غير ان تعاتبني يا عم احمد

ماذا من الممكن ان استفيد من قانون كيرشوف الاول والثاني

لاني انا مش حفهم الا اذا احتجت هذا القانون

ياريت امثلة تضع الواحد في مأزق ويخلصها منه هذا القانون

لو انك لغيت قوانين كيرشوف وبالمرة قانون اوم وبالمرة سفينن يانور مش هتقدر تصمم دوائر التى اساس حسابتها تلك القوانين
انت بتفكرنى بالضبط بابنى لقيته ماسك الة حاسبة وهو فى خمسة ابتدائى بيعمل عليها حسابات جدول الضرب والقسمة
شخطت فيه وقلت له اتعلم تقسم وتضرب وتجمع بدون الة حاسبة
قال لى وليه اتعب نفسى طالما الالة موجودة
احنا بنتعلم يانور ازاى نستعمل التكنولوجيا ولكن للاسف لم نتعلم كيفية تصميمها
واساس التصميم يانور هى المعادلات سواء الرياضية او الكهربية

واخيرا ارجو ان لايكون ردى فيه نوع من العتاب

السلام عليكم.

الله ينور عليك ياأستاذ احمد, الشرح اكتر من رائع
انا فهمتها الحمد لله, كانت مشكلتى فى الجمع بين المعادلتين ولكن انت وضحتها كويس.
ياريت لو عندك مسائل للتدريب عن قوانين كيرشوف.

طيب الحمد لله
احسن شيئ ادخل طبق على برنامج المحاكاة وحط اميتر على التوالى يقرى لك التيارات وانت بالمعادلات اوجد قيمة تلك التيارات وقارن النتائج التى حصلت عليها من المعادلات مع قراءة برنامج المحاكاة

وحاول تدرب نفسك بنفسك ولو وقف معاك شيئ انا تحت امرك

شكرا ياأستاذ احمد على اهتمامك,
انا نزلت برنامج اسمه التمساح من برامج المحاكاة
ايه رأيك ينفع ابدأ بيه ولا ترشحلى برنامج اخر؟

لاتمساح ولاحوت
انصحك فى البداية بالعمل على برنامج سيركت ويزيرد circuit wizard
فهو رائع للمبتدئين وموفر للوقت وسهل جدا فى التعامل معاه وهو موجود فى قسم البرامج مثبت هناك ونسخة كاملة نزله اخونا عبد الله ومعاه كمان شرح بالفيديو ثلاث اجزاء بصوتى
بعد ماتتمكن وتبقى تمام اشتغل على بروتس